مون سون کا نیا سلسلہ شروع، دریا ئے چناب میں سیلاب ، کئی دیہات زیرآب آگئے

اسلام آباد (ویب ڈیسک) ملک میں مون سون کا نیا سلسلہ شروع ہو گیا، سیالکوٹ میں شدید بارشوں سے نشیبی علاقے زیر آب آ گئے، مکین گھروں میں محصورہو گئے، دریائے چناب بپھرنے سے 30 دیہات زیر آب آ گئے، کرک، گلگت، صوابی میں بھی بادل برس پڑے، لاہور سمیت پنجاب اور جڑواں شہروں میں بھی بارش کی پیش گوئی کی گئی ہے، جبکہ کراچی میں مون سون کا تیسرا سسٹم آج سندھ میں داخل ہونے کا امکان ہے،تھرپارکر میں کئی گھنٹے کی بارش سے تھر واسیوں کے چہرے کھل اٹھے۔راولپنڈی اسلام آباد میں مطلع جزوی ابر آلود ہے،جڑواں شہروں میں آج گرج چمک کے ساتھ بارش کا امکان ہے، موسم کا حال بتانے والوں کا کہنا ہے کہ کشمیر،بالائی پنجاب، ہزارہ، میر پورخاص، حیدر آباد ڈویژن میں اکثر مقامات پرجبکہ فاٹا، خیبرپختونخو، ڈی جی خان، ملتان، ساہیوال، بہاولپور، سکھر، لاڑکانہ، شہید بینظیر آباد، سبی، ژوب، نصیرآباد ڈویژن اور گلگت بلتستان میں کہیں کہیں تیز ہواؤں اور گرج چمک کیساتھ بارش کی توقع ہے جبکہ چند مقامات پرموسلا دھار بارش کا بھی امکان ہے،آئندہ دو روز کے دوران راولپنڈی، سرگودھا، گوجرانوالہ، لاہور، فیصل آباد، ہزارہ، میرپورخاص، حیدرآباد ڈویژن اور کشمیر میں اکثر مقامات پر تیز ہواوں اور گرج چمک کے ساتھ بارش کی پیشنگوئی ہے۔