نواز شریف نے چوہدری نثار سے راستے الگ کرنے کا فیصلہ کیا

لاہور(نیوز ڈیسک ) نواز شریف نے چوہدری نثار سے راستے الگ کرنے کا فیصلہ کیا ہے۔ تفصیلات کے مطابق کئی ماہ سے جاری سیاسی کشمکش کے بعد اب نواز شریف کا ضبط جواب دے گیا ہے۔ قومی اخبار کی رپورٹ کے مطابق نواز شریف اور چوہدری نثار میں اختلافات بے حد شدت اختیار کر گئے ہیں۔ چوہدری نثار کی جانب سے عدلیہ مخالف مہم کا حصہ نہ بننے کے اعلان کے بعد نواز شریف نے اپنے پرانے ساتھی سے راستے الگ کرنے کا فیصلہ کیا ہے۔

نواز شریف نے موقف اختیار کیا ہے کہ ان کیلئے چوہدری نثار کے بیانات اب برداشت سے باہر ہیں۔ نواز شریف نے چوہدری نثار کے بیانات کو پارٹی ڈسپلن کی خلاف ورزی قرار دیا ہے۔ نواز شریف نے چوہدری نثار کو آخری پیغام بھیجتے ہوئے فیصلہ سنایا ہے کہ جو بھی رہنما عدلیہ مخالف مہم کا حصہ نہیں بنے گا، پارٹی میں اس کیلئے مزید کوئی جگہ نہیں ہوگی۔ چوہدری نثار مسلسل پارٹی اور قائدین کی توہین و تذلیل کر رہے ہیں۔ اس تمام صورتحال میں بہتر ہے کہ چوہدری نثار ہم سے اپنے راستے بدل لیں۔