اقوام متحدہ کی شمالی کوریا پر نئی پابندیاں عائد،چین ،روس کی بھی حمایت

نیویارک(ڈیلی خبر)اقوام متحدہ کی سلامتی کونسل نے شمالی کوریا کے حالیہ بیلسٹک میزائل تجربوں کے جواب میں اس پر مزید سخت پابندیاں لگانے کی قرارداد اتفاق رائے سے منظور کر لی ۔امریکی قرارداد کے مسودے میں شمالی کوریا کی تمام تیار پیٹرولیم مصنوعات کی برآمدات 90 فیصد تک کم کرنا شامل ہے۔چین اور روس جو کہ شمالی کوریا کے بڑے تجارتی پارٹنر ہیں نے بھی اس قرارداد کے حق میں ووٹ دیا ہے۔خیال رہے کہ شمالی کوریا پر پہلے ہی امریکہ، اقوام متحدہ اور یورپی یونین کی جانب سے کافی پابندیاں لگائی جا چکی ہیں۔امریکہ 2008 سے شمالی کوریا

پر پابندیاں لگا رہا ہے۔ شمالی کوریا کے جوہری پروگرام سے منسلک افراد اور کمپنیوں کے اثاثے منجمد کیے گئے ہیں۔ادھر شمالی کوریا کے سربراہ کم جانگ اْن نے کہاہے کہ جوہری ہتھیار بنانے کے لیے شمالی کوریا کے جوہری پروگرام سے بین الاقوامی سیاست میں اْن کے اثرو رسوخ میں نمایاں اضافہ ہوا ہے۔غیرملکی خبررساں ادارے کے مطابق اقوام متحدہ میں امریکہ کی سفیر نیکی ہیلی نے کہاکہ ان پابندیوں سے شمالی کوریا کو واضح پیغام دیا جائے گا کہ مزید خلاف ورزی کرنے پر اسے مزید سزائیں اور علیحدگی کا سامنا کرنا پڑے گا۔سلامتی کونسل کی حالیہ قرارداد میں بیرون ملک کام کرنے والے شمالی کوریا کی افرادی قوت کو ایک سال کے اندر اندر واپس بھیجوانے کی تجویز بھی دی گئی ہے۔اقوم متحدہ کی سلامتی کونسل میں شمالی کوریا کے خلاف مزید پابندیاں عائد کرنے پر رائے شماری سے قبل شمالی کوریا کے رہنما کم جانگ اْن کا کہنا تھا کہ شمالی کوریا امریکہ کے لیے حقیقت میں ایک بڑا جوہری خطرہ بن کر سامنے آیا ہے۔سرکاری خبر رساں ایجنسی کے مطابق کم جانگ اْن نے کہا کہجوہری ہتھیار بنانے کے لیے شمالی کوریا کے جوہری پروگرام سے بین الاقوامی سیاست میں اْن کے اثرو رسوخ میں نمایاں اضافہ ہوا ہے۔یاد رہے کہ چند ماہ قبل شمالی کوریا نے بین البراعظمی بیلسٹک میزائل کے کامیاب تجربات کیے تھے اور دعویٰ کیا تھا کہ امریکہ اب اس کے میزائل کی رینج میں ہے۔