”آئندہ انتخابات میں ڈاکٹر عامر لیاقت کی برکت سے پی ٹی آئی۔۔۔“ معروف صحافی جاوید چوہدری نے ایسے انداز میں ڈاکٹر عامر لیاقت کی پی ٹی آئی میں شمولیت پر تبصرہ کر ڈالا کہ ہر کسی کی ہنسی چھوٹ جائے گی

اسلام آباد (ڈیلی خبر) معروف عالم دین ڈاکٹر عامر لیاقت نے پاکستان تحریک انصاف (پی ٹی آئی) میں شمولیت اختیار کر لی ہے جس پر تحریک انصاف ہی کے متعدد رہنماﺅں اور کارکنان کی جانب سے احتجاج کیا جا رہا ہے جبکہ صحافی بھی اپنے اپنے طور پر تجزئیے کرنے میں مصروف ہیں۔معروف صحافی جاوید چوہدری نے بھی اس معاملے پر اپنا تجزیہ پیش کیا مگر کچھ ایسے انداز میں، کہ دیکھنے والوں کی ہنسی چھوٹ جائے گی۔ انہوں نے اپنے پروگرام میں گفتگو کرتے ہوئے کہا ”ملک کے نامور عالم دین ڈاکٹر عامر لیاقت حسین نے تحریک انصاف جوائن کر لی۔ ڈاکٹر صاحب نے دوسری مرتبہ اپنا سیاسی کیرئیر شروع کرتے ہوئے فرمایا انتخابات میں پاکستان تحریک انصاف کراچی میں کلین سویپ کرے گی۔یہ وہ جرات اور ہمت تھی جس سے ڈاکٹر صاحب کے آنے سے پہلے پاکستان تحریک انصاف محروم تھی۔ آج تک عارف علوی، عمران اسماعیل، علی زیدی، خرم شیرزمان، فیصل واڈا حتیٰ کہ حلیم عادل شیخ بھی یہ دعویٰ نہیں کر سکے۔ اللہ تعالیٰ نے یہ ہمت اور جرات صرف ڈاکٹر عامر لیاقت حسین کو عنایت کی ہے۔یہ واقعی جس پارٹی میں رہے اس پارٹی نے ہمیشہ کلین سویپ کیا۔ 2018ءکے انتخابات میں ہو سکتا ہے کہ ڈاکٹر صاحب اپنی سیٹ نہ نکال سکیں لیکن پارٹی ان کی برکت سے ضرور کلین سویپ کرے گی۔ میں آج عمران خان کی اعلیٰ ظرفی کا بھی قائل ہو گیا ہوں۔ یہ واقعی کھلے دل کے انسان ہیں۔ اگر ان کا دل تنگ ہوتا تو یہ ڈاکٹر عامر لیاقت حسین کے اس ماضی کے بعد کبھی چل کر ان کے پاس نہیں جاتے۔ جو ہوا، اچھا ہوا اور یہ اچھا آنے والے دنوں میں مزید بہت اچھا ہو جائے گا۔“