نیب ایگزیکٹو بورڈ کا اجلاس، سپیکر خیبر پختونخوا اسمبلی کے خلاف موصول درخواست کی جانچ پڑتال کی منظوری

اسلام آباد (ڈیلی خبر) نیب نے سپیکر خیبر پختونخوا اسمبلی اسد قیصر کے خلاف موصول درخواست کی جانچ پڑتال سمیت مختلف لوگوں کے خلاف ہونے والی 4 انکوائریوں کو ریفرنسز میں تبدیل کرنے کی منظوری دے دی۔ چیئرمین قمر زمان چوہدری کی زیر صدارت نیب ایگزیکٹو بورڈ کا اجلاس ہوا جس میں 4 انکوائریوں کو ریفرنسز میں تبدیل کرنے کی منظوری دی گئی۔ اجلاس میں سپیکر خیبر پختونخوا اسمبلی اسد قیصر کے خلاف موصول درخواست کی جانچ پڑتال اور میگا کرپشن میں ملوث سی ڈی اے افسران کے خلاف تحقیقات کا حکم دیا گیا ۔ نیب ایگزیکٹو بورڈ کے اجلاس میں یونیورسٹی آف پنجاب کی انتظامیہ اور رکن قومی اسمبلی سلطان محمود ہنجرا کے خلاف بھی تحقیقات کرنے کا فیصلہ کیا گیا۔ علاوہ ازیں نیب کے اجلاس میں فیصلہ کیا گیا کہ سابق صدر نیشنل بینک علی رضا اور سابق آئی جی سندھ غلام حیدر جمالی کے خلاف ریفرنس دائر کیے جائیں گے۔