”ڈاکٹر مجھے نکالنا چاہتے ہیں لیکن۔۔۔“ ہسپتال میں زیر علاج کامیڈی کنگ نے ایسی بات کہہ دی کہ ہر کوئی کھلکھلا اٹھا، اب ان کی صحت کیسی ہے؟ بڑی خبر آ گئی

لاہور (ڈیلی خبر) کامیڈی کنگ امان اللہ سرجی میڈ ہسپتال میں زیر علاج ہیں اور تیزی سے صحت یابی کی جانب گامزن ہیں۔ وہ بیماری کی حالت میں بھی کامیڈی کے بادشاہ ہی نکل کیونکہ ساتھی فنکار عیادت کیلئے آئے تو جگتوں سے بچ نہ پائے، حتیٰ کہ رپورٹر کو بھی انہوں نے ’رگڑا‘ لگا دیا۔
رجی میڈ ہسپتال میں موجود رپورٹر نے امان اللہ سے ان کی صحت کے بارے میں پوچھا تو انہوں نے جواب دیا کہ ”شکر ہے اللہ پاک کا کروڑ، کروڑ شکر ہے۔ کہتے ہیں تو میں کروڑ میں سے کچھ کم کر دیتا ہوں۔ آپ کیلئے یہ رعایت کر سکتا ہوں۔“ جب ان سے ڈاکٹرز کی تجاویز اور رائے کے بارے میں پوچھا گیا تو ان کا کہنا تھا ”ڈاکٹر صاحب تو بہت اچھے ہیں اور باجی شاہینہ، ڈاکٹر آصف، ظفر صاحب بہت پیار کرتے ہیں۔ خاور عباس صاحب تو مجھے نکالنا چاہ رہے ہیں کہ جاﺅ گھر، لیکن میں نہیں جا رہا اور سوچ رہا ہوں کہ مزید آرام آ جائے اور ساتھ باہر سردی بھی بہت ہے نا۔“

ایک اور سوال کے جواب میں انہوں نے کہا کہ ”یہ ساتھی ہیں میرے پیارے، اللہ انہیں زندگی دے، یہ بہت پیارے اور باصلاحیت فنکار ہیں، باخدا بات ہے اور ویسے بھی اس وقت میں جھوٹ بول ہی نہیں سکتا کیونکہ میں اس وقت گرفت میں ہوں۔“