یہ میری نہیں بلکہ پاکستان کی کامیابی ہے ،ہمیشہ کوشش کی کہ جونیئرز کھلاڑیوں کو راستہ دوں ،اسد شفیق اور اظہر علی سے اپنے آئیڈیا ز شیئر کیے : یونس خان

جمیکا(اسپورٹس ڈیسک )قومی ٹیسٹ ٹیم کے کھلاڑی یونس خان نے دس ہزار رنز مکمل کرنے والے پہلے پاکستانی کھلاڑی ہونے کا اعزاز حاصل کر لیاہے ،ان کا کہناہے کہ یہ میری نہیں بلکہ پورے پاکستان کی کامیابی ہے اور میری خواہش ہے کہ مزید پاکستانی کھلاڑی یہ سنگ میل عبور کریں ،ٹیسٹ کرکٹ کو مزید پروموٹ کرنے کی ضرورت ہے ۔نجی ٹی وی سے گفتگو کرتے ہوئے یونس خان کا کہناتھا کہ جب وہ انٹرنیشنل کرکٹ میں آئے تو اس وقت ٹیم کے کپتان سعید انور تھے اور انہوں نے مجھ سے اپنی بہت سی چیزیں شیئر کیں جبکہ میں نے بھی اپنی بہت سی چیزیں ان کے ساتھ شیئر کیں ،جب میں ٹیم میں آیا تو بہت سارے سٹار پلیئر زملے جن سے بہت کچھ سیکھا ۔
یونس خان کا کہناتھا کہ صبر کا پھل بہت میٹھاہوتاہے اور دس ہزار رنز مکمل کرنے کیلئے بہت انتظار کرنا پڑا ،میں نے قومی ٹیم کے کھلاڑی اسد شفیق اور اظہر علی کے ساتھ اپنے آئیڈیاز شیئر کیے ،میں نے ہمیشہ کوشش کی میں اپنے جونیئرز کو راستہ دوں ،جب میں ٹیم میں نہیں رہوں گا تو آپ ان سے پوچھیں گے تو میرے بارے میں بتائیںگے ۔میں نے ہمیشہ انہیں موٹی ویٹ کیاہے کہ آپ لوگ بھی کر سکتے ہیں ،آپ بھی دس ،گیارہ اور بارہ ہزار رنز بنا سکتے ہیں ۔ان کا کہناتھا کہ میں نے وسیم اکرم اور وقار یونس جیسے انتہائی قابل باولرز کے ساتھ کھیلا ۔اینکر نے یونس خان سے ریٹائرمنٹ کے حوالے سے یوٹرن کی چلنے والی افواہوں کے بارے بات کی تو ٹیسٹ کرکٹر کا کہناتھا کہ میرے دوست کھلاڑی کہتے ہیں ابھی رہنے دو،ابھی ایک یا دو سال کھیلو لیکن میں انہیں یہی کہتاہوں کہ اب مجھے جانے دیں کیونکہ یہ میرے فیوچر کیلئے اچھاہے ۔اگر میں ریٹائرمنٹ کا فیصلہ واپس لینے کے بارے میں سوچ رہا ہوتا تو یہ ان کیلئے خوشی کی بات ہونی چاہیے ۔واضح رہے کہ یونس خان نے اپنے کیرئیر کا آغاز 2000ءمیں راولپنڈی کے گراونڈ میں سری لنکا کیخلاف کیا تھا اور انہوں نے ساتویں نمبر پر کھیلتے ہوئے سینچری بنائی تھی ۔یونس خان اس وقت سنیل گواسکر سے 87رنز پیچھے ہیںاور امید ہے کہ اسے بھی عبور کرنے کا اعزاز حاصل کریں گے