لاہور:بارش کے دوران چھتیں گرنے سے دو افراد جاں بحق

لاہور (نیوز ڈیسک) لاہور کے مختلف علاقوں میں موسلادھار بارش سے چھتیں گرنے سے دو افراد جاں بحق اور سات زخمی ہوگئے، کئی علاقوں میں فیڈر ٹرپ ہونے سے بجلی کی فراہمی معطل ہے۔ پنجاب کے مختلف علاقوں میں بھی تیز بارش ہوئی جس سے نشیبی علاقے زیر آب آگئے۔ پنجاب کے مختلف علاقوں میں ابر رحمت کھل کر برسا، رات گئے کئی علاقوں میں موسلا دھار بارش ہوئی، کئی علاقوں میں پانی کھڑا ہوگیا، نشیبی علاقے زیر آب آنے سے پانی گھروں میں داخل ہوگیا جس سے لوگوں کو مشکلات کا سامنا کرنا پڑا۔ بارش کی وجہ سے ملتان چونگی اور اچھرہ میں چھتیں گرنے سے دو افراد جاں بحق ہوگئے جبکہ خاتون سمیت سات زخمی ہوئے۔ برسات کے بعد لاہور سمیت پنجاب کے مختلف شہروں میں فیڈر ٹرپ کرگئے جس کی وجہ سے بجلی کی فراہمی معطل ہوگئی۔ اب بھی کئی علاقے ایسے ہیں جہاں بجلی بحال نہیں کی جاسکی۔