بنوں میں طوفانی بارش نے تباہی مچا دی، چھتیں گرنے اور مختلف حادثات میں 2 افراد جاں بحق، 42زخمی

اسلام آباد/بنوں / ایبٹ آباد (ڈیلی خبر)محکمہ موسمیات نے آئندہ چوبیس گھنٹے کے دوران مزید بارش کی پیش گوئی کر دی،بنوں میں طوفانی بارش نے تباہی مچا دی، گھروں کی چھتیں گرنے اور مختلف حادثات میں 2 افراد جاں بحق اور 42زخمی ہو گئے، تیز بارش کی وجہ سے درخت بھی اکھڑ گئے اور بجلی کی فراہمی بھی معطل ہو گئی۔بنوں اور گردو نواح میں بدھ کی صبح سویرے طوفانی بارش نے نظام زندگی درہم برہم کر دیا۔ تیز ہوائیں چلنے سے درخت اور سائن بورڈ گر گئے، نشیبی علاقوں میں پانی کھڑا ہو گیا۔ گھروں کی چھتیں گرنے اور مختلف حادثات میں دو افراد جاں بحق اور بیالیس زخمی ہو گئے۔ بارش کی وجہ سے بجلی کا نظام بھی متاثر ہوا۔ ایبٹ آباد میں بھی تیز بارش ہوئی جس سے لینڈ سلائیڈنگ سے سڑکیں بند ہو گئیں اور لوگوں کو مشکلات کا سامنا کرنا پڑا۔خیبرپختونخوا کے دیگر علاقوں میں بھی بارش سے دریاؤں میں پانی کی سطح بلند ہو گئی جس کی وجہ سے سیلاب کا خدشہ ہے۔لاہور میں بھی اب رحمت کھل کر برسا جس سے نشیبی علاقوں میں پانی کھڑا ہو گیا۔ محکمہ موسمیات نے آئندہ چوبیس گھنٹے کے دوران مزید بارش کی پیش گوئی کر دی۔بارش کے بعد نشیبی علاقوں میں پانی جمع ہو گیا جس سے ٹریفک کی روانی بھی متاثر ہوئی اور دفاتر جانیوالوں کو مشکلات کا سامنا کرنا پڑا۔اسلام آباد سمیت میانولی، کلرکہار، شیخوپورہ، جھنگ، سرگودھا، ڈسکہ، ناروال اور پسرور سمیت پنجاب کے مختلف شہروں میں تیز بارش ہوئی جس سے نشیبی علاقوں میں پانی کھڑا ہو گیا۔